Om Gro Marie Svidal
Gro Marie Svidal (f. 1980) er hardingfelespelar frå Jølster i Sunnfjord. Ho har fordjupa seg i slåttetradisjonen i Sunnfjord gjennom opplæring i Indre Sunnfjord Spelemannslag, og som elev av hardingfelenestor Sigmund Eikås.
Svidal har vakse opp i ein folkemusikkfamilie med mor, Arny Vie Svidal og far Egil Svidal som vegvisarar inn i tradisjonen. Foreldra har vore kappleiksdansarar i eliteklassen, kl. A, på Landskappleik sidan 1978. Far spelar også kontrabass i Indre Sunnfjord Spelemannslag.
Gro Marie Svidal har musikkutdanning frå Ole Bull akademiet på Voss. Mellom 2002-2004 studerte ho under hardingfelespelar, Håkon Høgemo, og fordjupa seg i repertoaret frå Indre Sogn og Voss. Særleg er det slåttar Høgemo har etter sin læremeister, Lars Skjervheim frå Voss, som Svidal har ført vidare.
Gjennom kurs har Gro Marie Svidal fått ta del av fleire slåttetradisjonar, og lært hos utøvarar som Knut Hamre og Ingeleiv Kjærland Kvammen frå Hardanger, og Leif Rygg frå Voss.
Svidal har ein utøvande bachelor i folkemusikk frå Norges Musikkhøgskule der ho mellom 2004-2006 studerte under Håkon Høgemo. Frå 2006-2008 studerte ho under Sigmund Eikås samstundes som ho hadde timar i improvisasjon med bassist Bjørn Kjellemyr og felespelar Nils Økland.
Frå 2008-2010 studerte Svidal master i utøving med fordjupingsemne, ein musikkvitskapleg master i musikkformidling med Kristin Kjølberg som rettleiar. Studiet resulterte i avhandlinga «Ve’dunderlæ: perspektiv på den munnlege kommentaren i hardingfelekonserten» der ho undersøkte perspektiv ved den munnlege kommentarar i solohardingfelekonsertar i lys av publikum si oppleving av slåttane som vert spelt.
Svidal har i sitt utøvande virke fremst arbeidd i det sceniske feltet. Ho har medverka i teateroppsetjingar som musikar, dansar og skodespelar. Ho har også skapt teatermusikk til to barneførestillingar, og til ein danseproduksjon. Mest kjend er ho for hovudrolla i teateroppsetjinga Den vesle Prinsen i regi av Sigurd Aae Klaussen, produsert av Førde Internasjonale Folkemusikkfestival og Sogn og Fjordane Teater. Svidal har lang erfaring som utøvar i barneproduksjonar, og har turnert med Den Kulturelle Skulesekken og Rikskonsertane i ei årrekke.
I 2009 gav Gro Marie Svidal ut sin første solo CD som hausta gode kritikkar i norsk og internasjonal media. I 2012 gav ho ut, saman med Sigmund Eikås, Erlend Apneseth og Synnøve S. Bjørset Albumet «Jølster 2012», og i 2016 kom det andre soloalbummet «Eilov». Alle tre utgjevingane vart nominerte til «Folkelarmprisen». I tillegg har Svidal medverka på åtte andre utgjevingar innan sjangrane folkemusikk og pop.
I 2000 kvalifiserte Svidal seg til eliteklassen, kl. A i spel hardingfele på Landskappleiken, og har topp-plasseringar i lokale og regionale konkurransar. I 2014 vann ho, som tredje kvinne nokon gong, eliteklassen på Landskappleiken. I 2013 vart Svidal tildelt Statens Kunstnarstipend for yngre nyetablerte kunstnarar. Ho har fått arbeidsstipend frå Sogn og Fjordane fylkeskommune og Rådet for folkemusikk og folkedans.
Gro Marie Svidal har spelt konsertar i ei rekke land mellom anna: Egypt, Zimbabwe, Sudan, Filippinane, Kina, Italia, Storbritannia, Island, Finnland og Sverige. Ho har vore instruktør i både spel og dans i lokale spelemannslag og på landsdekkande barne- og ungdomskurs: Mokurset, UngLåt, UngFolk, Strunkeveko og Talentskulen.
Svidal har hatt tillitsverv i styret i FolkOrg og i Rådet for folkemusikk og folkedans. Ho har også vore prosjektleiar for fleire landsdekkande folkemusikk- og folkedansprosjekt.
